2018年春季期間限定抹茶甜品特集

春季至初夏係新茶收成嘅季節，所以日本最近有唔少期間限定嘅抹茶甜品陸續登場。嚴選以下幾款必試推介，抹茶控一落機要手刀衝去試吓啦～

Restaurant Mister Donut － Misdo x 衹圓辻利抹茶甜品premium

即日起至5月下旬供應

上年大獲好評嘅Mister Donut x Restaurant 祇園辻利 聯乘甜品系列今年載譽歸來，全部採用宇治初摘抹茶製成。

推介「雙倍宇治抹茶波堤 (151円)」，食落煙韌彈牙又夠抹茶味；「黑糖冬甩 (194円)」有兩款口味，分別係紅豆白玉或黑蜜啫喱蕨餅餡。鐘意食cream嘅話可以揀「宇治抹茶紅豆 / 黑蜜法蘭奇 (各183円)」或者「宇治抹茶忌廉冬甩(151円)」，口感輕盈唔會太膩。

Restaurant Lindt Chocolat Cafe －白朱古力抹茶特飲 / 抹茶馬卡龍

即日起至5月31日供應

Lindt每年都會推出人氣期間限定特飲，今年嘅抹茶特飲據講有兩倍抹茶份量，飲落有濃郁茶味，仲有醇厚嘅白朱古力，甜味及茶甘味平衡得恰到好處。除此之外，選用自家Lindt朱古力製作而成嘅馬卡龍「Délice Chocolat Noir」都推出抹茶口味 (302円/件)，同樣值得一試！

(圖: Lindt)

想同一時間試哂特飲同馬卡龍嘅話，不妨叫個「Délice Set」，可以自選1杯飲品及2件馬卡龍，計落好似仲抵食。不過留意返，呢個Set喺銀座分店及Outlet分店冇供應架。

Ginza Cozy Corner －和風甜品巡禮

即日起供應

Ginza Cozy Corner呢個「和風甜品巡禮」唔單止有各款抹茶甜品，仲有黃豆粉、焙茶等口味嘅蛋糕添。推介「八女・宇治・西尾抹茶蛋榚拼盤 (1,134円)」，一次過可以試勻日本三大名產地抹茶製作而成嘅蛋糕。

想單點一件嘅話，「宇治抹茶芝士蛋榚 (464円)」、「西尾抹茶牛奶千層蛋糕 (421円)」都係人氣之選嚟架。