京都俾人嘅印象都係日本茶同抹茶，但原來唔講唔知，京都人均咖啡消費量係全日本排名第一架。唔少當地嘅咖啡店仲會加入「京都元素」，更富古都特色。 今次小編就精選咗幾間京都必訪嘅咖啡店介紹返，各位咖啡迷、真／偽文青要Bookmark！
%Arabica 京都
香港啡迷對「%Arabica」相信都好熟悉，總店於2013年喺香港愉景灣開業，後來於京都掘起，成為啡迷們必到嘅朝聖地。
從挑選咖啡豆到烘焙都非常講究，店內只賣咖啡豆及咖啡，保持純粹嘅咖啡空間。首席咖啡師曾獲得日本咖啡拉花大賽冠軍，拉花效果當然美感十足。
▲(圖左) 熱拿鐵咖啡 short:450円 / tall:500円。(圖右) 咖啡豆及自家設計產品均有待售。
值得一提係京都其中兩間分店都鄰近著名景點，最出名嘅嵐山店對正桂川兼可遠眺渡月橋，東山店附近則有八坂の塔、八坂庚申堂，望住靚景歎咖啡，都咪話唔爽。
(圖: 官方facebook)
呢間分店上年開業，由百年古民宅改建而成，係全球唯一一間有榻榻米座位嘅Starbucks，成為全球Starbucks迷必到分店之一。
(圖: 官網)
掀開門口嘅「暖簾」入內，會見到點餐櫃檯，之後經過一條走廊到水吧櫃檯取餐。比較特別係走廊以京都東山嘅「花燈路」為概念，用最低限度嘅燈飾加上自然採光，營造獨特氛圍。取完飲品上二樓，有3間房係榻榻米座位，亦有可以眺望東山二寧坂嘅一般座位。比較可惜係呢間分店並冇任何店舖限定餐點，有埋就perfect池喇。
唔少啡迷去日本，都會專誠去來自美國嘅Blue Bottle Coffee打卡，呢間京都店係關西地區首間分店，店面同樣係以過百年歷史嘅傳統京都民宅改裝而成。
▲門口已經係靚靚影相位
▼店舖分為兩幢，近馬路嗰幢係賣周邊商品嘅商店，穿過中庭先係咖啡店。
咖啡店內樓底好高，又有落地玻璃，感覺好開揚。店內裝修係極簡約風格，盡量保留古建築嘅原貌，斑駁嘅牆壁同橫樑成為該店獨有嘅風景。
介紹返，呢度有店舖限定嘅「綠茶薄荷曲奇 (連稅216円)」，配咖啡啱哂。周邊商品係招牌藍白風格，當然仲有專屬咖啡豆，值得入手。
延伸閱讀：日本兩大人氣迴轉壽司攻略【後篇】