冬季返鄉下雖然話一入室內就有暖氣，但始終喺條街行多一陣都凍入心，呢個時候最適合做嘅事當然就係圍爐取暖啦！講緊圍住火鍋啊，食完成身暖哂又可以繼續周圍走或者安心返住宿點覺覺豬啦~而且我哋今次要為大家介紹嘅鍋物都絕對非汎汎之輩，想食特色嘢打卡嘅記得要收藏甚至預約返幾間啊！
いちりん (新宿)
海膽控絕不能錯過！呢度嘅招牌海膽涮涮鍋好出名，深橙色湯底跟極新鮮肥美嘅蝦、帶子、白身魚同野菜配搭得極完美，海膽濃厚嘅味道同食材互相輝映，各自都精彩！而且Shabu Shabu完仲可以拎呢煲精華去煮雜炊，真係點可能唔滿足呢！不過又咁講，呢度嘅海膽涮涮鍋係唔會落肉嘅，但最貴嘅套餐入面仲有海膽茶碗蒸、超極濃海膽可樂餅、迷你海膽丼同炙燒和牛海膽，點都唔使擔心唔夠飽！只要從新宿三丁目駅行約3分鐘路程就搵到呢間ICHIRIN，而從大站新宿行過嚟都係約15分鍾~係咪好方便呢~~
しみず (中目黑)
👆🏻SHIMIZU
👆🏻博多 華味鳥
提起雞&火鍋呢個組合，大家可能相對地會比較熟悉喺日本各地都有分店嘅「博多 華味鳥」，尤其係佢哋嘅選址大部份都相當方便，人生路不熟嘅話，嚟呢度的確係個好選擇！但如果問東京女子ssss最喜愛嘅火鍋店係邊間店，相信都有為數唔少嘅票數會投畀主打骨膠原滿滿嘅水炊地雞火鍋——「SHIMIZU」！BTW，喺度淥完新鮮野菜同肉肉肉，暖笠笠地沿住旺中帶靜嘅中目川散步返地鐵站都好浪漫~情侶們有得諗！
鶏匠 たけはし (六本木)
呢度可以話係距離六本木之森 & 六本木駅都非常近嘅秘店，因為佢哋掛咗布簾喺外面，從外只能夠喺隙縫間窺探入面嘅用餐情況。但佢哋嘅赤雞親子丼及燉煮咗8小時以上嘅特製骨膠原雞湯火鍋好鬼正呢件事就唔係咩秘密。好多食客都話湯底味道極濃厚，強烈建議大家喺未添加任何食材之前乾一碗！當然，最後煮成嘅精華雜炊都唔好浪費啊！食哂火鍋配料又想再加點嘅可以揀雞肉刺身試試，如果係甜品控更加要記得叫埋自家製雞蛋布甸啊！
北海道めんこい鍋 くまちゃん温泉 渋谷宮益坂店 (涉谷)
在 Instagram 查看這則帖子
SNS上超高人氣、超可愛嘅札幌一人小熊鍋，已經喺2021年年末於東京開設分店，店內有大量熊熊裝飾，同本店一樣有勁多遊客同本地人朝聖，唔預約嘅話都幾肯定入唔到去！相信大家都知隻熊仔其實係湯底嚟，唔同顏色嘅熊熊分別係豆乳湯、雞骨膠原湯、純米吟釀味噌湯及擔擔湯等。店家都經常推出期間限定口味如明太子、番茄香草、咖喱，就算之前食過都一樣有新意！
浅草一文 本店 (淺草)
用有70幾年歷史嘅古民居改建，坐喺入面食日本傳統料理就當然有Feel啦！呢度招牌菜係由江戶時代承傳至今嘅青蔥鮪魚 (吞拿魚) 鍋，調味以蔥、醬油同清酒為主，簡簡單單但充分帶出魚鮮，一齊煮嘅菜亦都入哂味。雖然都有唔少人認為大拖羅都係用嚟整刺身/壽司更好，但體驗吓不一樣嘅食法同味道都係旅行嘅樂趣嚟！
👉🏻繼續睇 圍爐取暖攻略🍲東京火鍋10選 (下)