「BAKE」嘅芝士撻相信唔少人都食過，其實「BAKE」旗下仲有幾個甜品品牌，水準同樣出色。今次小編就親試其中兩間大熱必買手信，即睇以下介紹！
新宿人氣長龍新店
▼呢度獨賣一款三角形流心蕃薯撻，朝早11點準時開舖，新鮮出爐嘅蕃薯撻已經一個個排列整齊，令人流哂口水！
▼小編購買當日係每人限購5件。單買1件320円(未含稅)，5件裝1500円(未含稅)。
▼POGG 流心蕃薯撻 5件裝
蕃薯撻以嚴選日本國產蕃薯製成。外層係口感綿糯嘅蕃薯蓉，內層有流心蕃薯忌廉，底層係酥脆千層批底，層次豐富。購買日起計保質期三天，買嚟做手信都得。(購買當日無需冷藏，第二日起要冷藏保存，建議預熱焗爐至200°C加熱10分鐘後享用。)
東京車站必買手信
招牌「焦糖牛油忌廉夾心餅」選用北海道產牛油及忌廉，食落奶味更香醇。而且製作方法非常特別，先用店家獨有的壓機將麵團壓烤，再以人手逐件擠上牛油忌廉及焦糖醬夾心，據講可以保持到最佳口感及風味。
雖然開業都有一段時間，但連日嚟排隊人潮未停過。繁忙時間或者會派籌，籌上面寫住幾點有得返嚟拎，客人唔駛企喺店前呆等。每日數量有限，售完即止，想買嘅話建議早少少嚟啦～
▼牛油夾心曲奇 (6件裝1,020円 / 10件裝1,700円 / 散買每件170円）
一打開個包裝就聞到濃郁嘅焦糖味。忌廉夾心入口即溶、甜度適中，仲有少少爆醬效果，曲奇亦鬆脆可口，整體味道平衡得恰到好處。
除咗東京車站、池袋車站、晴空塔呢3間分店，由即日至6月30日，喺羽田機場仲有
限定快閃店登場。快閃店獨賣嘅「PRESS BUTTER SAND 18件裝」，罐盒包裝簡潔洗鍊，更突顯到標榜職人風格嘅品牌定位。經羽田機場往返或轉機嘅話，千祈唔好錯過啦～
(圖: 官方facebook)