※2017年4月21日開幕※【全新園區「Minion Park」】
(圖片:日本環球影城)
園區整體以Minions嘅Boss犀利哥生活嘅小鎮為概念，最新嘅「迷你兵團調皮百厭乘車遊」有全球最大型嘅曲面螢幕，仲有最新高性能投影技術，令影像更鮮明真實，增加臨場感。遊客將會坐上犀利哥嘅發明，喺佢嘅屋企同研究室巡邏冒險。
除咗玩，當然仲有主題美食啦！好似喺
Delicious Me! The Cookie Kitchen可以買到嘅「迷你兵團夾心曲奇(500円)」，有香蕉雪榚配雜果粒、鮮雜果配忌廉、燒棉花糖配芒果mousse、Tiramisu四種口味任君選擇。
另一款必食嘅仲有鹽味香蕉焦糖爆谷，但爆谷並唔係重點，重點係個爆谷筒，超得意，有King Bob(2980円)同Talking Bob(3480円)兩款，Talking Bob仲識講「Bello」㗎😍拎住佢影相拍片，肯定呃爆Like。而且4月19日至6月29日期間買King Bob款，又持有USJ全年通行證嘅顧客，爆谷可以免費無限次任添，一家大細或者成班朋友去都夠食(噢！首先係要有全年證先......)。想買嘅朋友記得去園區嘅爆啦吧娜娜買喇！ 
(圖片:日本環球影城)
【哈利波特魔法世界園區】
以小說《哈利波特》為主題嘅園區喺2014年開幕，將小說入面嘅「霍格華茲魔法與巫術學院」、「活米村」等場景呈現喺遊客眼前，當然仲有唔少遊樂設施，其中最受歡迎嘅絕對係「哈利波特禁忌之旅」。✨佢採用咗最新嘅4K3D技術，將大家帶到霍格華茲嘅上空高速飛翔，極富臨場感。
【投入魔法世界 園區美食Best 3】
活米村嘅老字號酒吧兼餐廳，一眾主角都飲過嘅奶油啤酒(淨飲品600円,連特色杯1100円)絕對係人人必點。嫌齋飲嘢唔夠喉，可以叫個「Great Feast拼盤 (7600円)」，有燒春雞+燒排骨+原條粟米同埋啲蔬菜咁，大約夠4個人食，另外仲有炸魚薯條之類嘅英國菜式𠻹。
豬頭酒吧
豬頭酒吧喺正「三根掃帚」隔離，兩間餐廳嘅內部仲係相連𠻹㗎。吧檯後面嘅野豬頭標本係呢度嘅標誌，除咗供應奶油啤酒、南瓜汁(800円)之外，仲有特別釀造嘅生啤酒同葡萄酒等酒精飲品供應。
想喺哈利波特園區買啲手信嘅話，就一定要嚟呢度啦。霍格華茲嘅學生都Like爆嘅糖果店喎，當然有好多千奇百趣嘅出品。好似鼻屎味糖同埋變壞嘅雞蛋味糖(嗱講定先，好唔好食見仁見智㗎咋...)，仲有青蛙造型嘅朱古力，仲唔係必試？！食完好似入咗魔法世界咁呀～
【環球奇境園區】
園區整體以史努比、Hello Kitty、芝麻街等人氣角色居住嘅小區為概念，入面分咗「史努比電影工作室」、「Hello Kitty時尚大道」、「芝麻街歡樂世界」三個區域，遊樂設施都充滿角色嘅可愛元素，啱哂一家大細一齊玩。
【超得意角色主題美食BEST3】Snoopy's Backlot Cafe
環球奇境園區裡面最大嘅Cafe，入面除咗可以搵到好多Snoopy，仲有漫畫嘅其他角色等緊大家，身為Fans一定要去打卡。餐點方面主要有漢堡包、意粉等輕食套餐，推介可以叫個蛋包飯炸蝦餐(1,450円)，跟餐仲有薯條同嘢飲。用嚟放食物嘅Snoopy盒都夠哂心思，一於相機食先。
喺呢間全粉紅色嘅小食亭度可以搵到好得意嘅Hello Kitty造型包(450円)，內餡係芝士同豬肉，據食家所講都有肉味而且調味啱啱好，另外仲有蘋果味Churros(450円)，玩到肚餓不妨買嚟醫醫肚。店舖旁邊有少量座位，可以坐低慢慢食，或者拎走邊行邊食亦得。
呢間餐廳嘅主廚係芝麻街入面最為食嘅曲奇怪獸，為大家供應輕食為主嘅芝麻街主題美食，好似三文治、泡芙、軟雪榚等。曲奇怪獸得閒仲會搞吓親子烹飪教室，教大家整原創甜品！嗚呀，真係好得意呀～
【荷里活園區】
園區重現1930至1940年代嘅美國荷里活大街，入面最受歡迎嘅遊樂設施有3樣，第1樣係「荷里活美夢．乘車遊」，佢係日本環球影城嘅第一個過山車。
想再刺激啲嘅話，可以玩佢嘅倒後行版本--「荷里活美夢．乘車遊～逆轉世界～」，連日本紅星木村拓哉同香取慎吾試玩完都勁Like！第3樣就係以宇宙空間為主題，每次旋轉次數同速度都唔同嘅「太空幻想列車 (關閉中，官網公告話2017年6月30日會重新開放)」。
【充滿美國風格 推介美食BEST4】
呢間法式咖啡店門面走歐美風格，供應三文治同甜品等。「Boulangerie Sandwich Meal(1,390円)」呢個餐可以喺4款三文治度揀1款，仲跟一份凱撒沙律同飲品，做早餐或者Brunch啱哂。
呢度由外到內都係粉紅色，夠哂夢幻夠哂少女，主要供應雪榚等甜品，而且差唔多款款食品都係粉紅色。不過最近大熱嘅都係黃黚黚嘅Minions系列甜品，好似檸檬梳打同香蕉Cupcake(570円)咁。
成間漢堡包店以1973年上映嘅美國電影「美國風情畫」為概念，勁有50年代Feel。食埋個Mel's 50年代三重芝士漢堡餐，或者BBQ煙肉芝士漢堡餐(各1590円)，直頭好似一秒穿越到50年代嘅美國咁呀。
呢間西餐廳以影城嘅自助食堂為藍本，最受歡迎嘅係「荷里活巨星套餐(1,790円)」，有半隻燒春雞、沙律、薯條、餐包／飯，夠哂份量，做晚餐都啱。
【紐約園區】
用1930年代嘅紐約街頭為設計背景，由時尚貴氣嘅第五大道到平民啲嘅地蘭西街都有，將當時嘅風景再次呈現。
園區入面有連續7年獲得Amusement Today之最優秀室內遊戲設施Golden Ticket獎第1名嘅「蜘蛛俠驚魂歷險記・乘車遊4K3D」。佢用咗超過100個特殊效果，遊客坐住嘅「車」仲會配合影像郁動，感覺好似化身成蜘蛛俠咁親歷其境！
【充分享受電影世界！ 推介美食BEST5】
餐廳裝潢以愛爾蘭嘅酒吧為主題，供應愛爾蘭菜同酒精飲品，其中啤酒種類都唔少。嘢食方面都係以套餐居多，份量一啲都唔輕食，好似「芬尼根燉牛肉套餐(1890円)」有愛爾蘭燉牛肉+韭蔥+薯仔湯+蘇打麵包，仲有其他肉類套餐以供選擇。
另外呢間餐廳仲有一款必食名物，就係「Onion Blossom(1100円)」啦！炸成花一樣嘅洋蔥配啤酒一流，而且賣相特別，唔使講又係相機食先。呢度仲有個吧檯提供當季Highball雞尾酒𠻹。
紐約曼哈頓下城有個俗稱「小意大利」嘅小區，而呢間意大利餐廳就以1930年代當時小區內嘅意大利餐廳為裝潢概念。
比較多人叫嘅係套餐「Louie's Italian Set (1450円)」，包括1片Pizza (口味2揀1)+半份意粉 (口味3揀1)+飲品，份量都唔算少，當然多人一齊去玩嘅話都可以叫個大Pizza開心Share。
日本環球影城入面唯一嘅日本餐廳。呢度無論裝潢同餐單都有啲西方風格，好似「牛ステーキと握り寿司御膳(2,440円)」咁，一個餐入面可以食到牛扒同握壽司。不過都有啲和式啲嘅餐嘅，「あさりうどん御膳 (2,040円)」就係蜆肉烏冬+4款天婦羅+竹葉飯糰+卷蛋，清清哋啱哂女士。
呢間Steak House嘅裝修勁有歐陸風格，而且供應嘅安格斯牛都經過精挑細選，有哂CAB認證。招牌嘅安格斯熟成牛扒(400g:5,000円 / 250g:3,800円)嘅油脂同紅肉比例完美，肉質柔軟又夠肉汁。除咗牛肉之外仲有燒豬肉、燒羊肉、燒龍蝦等其他選擇。
喺呢度可以食到正宗石窯烤出嚟嘅薄Pizza，麵粉係即叫即搓，烤好嘅Pizza口感脆卜卜。最受歡迎嘅口味係「ピッツァ アズーラ(2,840円)」同埋「トレ ガンベレッティ(2,540円)」，前者有4種芝士+生火腿+芝麻菜Pizza黑松露，後者有南美白對蝦+甜蝦+櫻花蝦+混合香料，而且份量唔細。
【侏羅紀公園園區】
入到呢個園區，就好似置身於電影侏羅紀公園嘅世界咁，又有亞熱帶森林又有恐龍。上年仲開咗個新遊樂設施「飛天翼龍」，路軌全長超過1公里，最大落差嘅高度有37.8米，係號稱「全球最長路軌」同「全球最大落差」嘅飛行式過山車。坐喺上面可以享受喺侏羅紀公園高速穿梭嘅感覺，超驚險刺激！
【食肉獸樂園！ 侏羅紀園區推介美食😋】必食名物火雞脾
呢隻喺小食亭「Splashdown Snacks」有售嘅火雞脾，堪稱為USJ必食名物，園區入面差唔多每人手上都有一隻，冇食過嘅話直頭好似冇去過USJ咁呀！淨火雞脾大約賣850円，加多幾百円可以連埋個好搞鬼嘅恐龍手套，俾你揸住食之餘，仲照顧埋你部相機，等你俾佢食先。火雞脾大大隻，味道亦都不錯𠻹。
裝潢以電影入面嘅遊客中心為藍本，入面仲有個實物大嘅恐龍骨標本，係餐廳嘅標誌。切合返個恐龍主題，餐單都係以肉類為主，啱哂食肉獸。最受歡迎嘅套餐要數「侏羅紀漢堡扒餐(1,690円)」，有漢堡扒+洋蔥圈+紅米飯，漢堡扒上面仲有個用炸薯條整成嘅「恐龍巢」，上面隻蛋色彩繽紛，切開蛋黃係流心㗎！
餓底們喺USJ玩，一定要留意埋園內嘅小食車，事關小食車都有賣唔同嘅主題小食，玩到攰嘅時候買番份邊食邊小休一下，啱哂！所以見到小食車嘅時候，記得行埋去八吓有咩好食啦～
各款角色造型包
環球影城人氣角色嘅造型蒸包，好似有「豬肉米粉蜘蛛俠包」、「照燒雞味Elmo包」等等，各賣450円，每款嘅餡料都唔同㗎！
「鯊魚的獵物」 ／ Churros
「鯊魚的獵物」其實係連骨嘅香腸(另包埋一個大白鯊造型手套)，日本網民話香腸皮脆有肉香又Juicy，喺水世界園區入面「大白鯊」旁邊嘅小食車就可以買到。
至於Churros就深受女士們熱捧，皆因佢細細支容易邊行邊食，而且又多口味，好似有朱古力、曲奇、楓糖等等，喺各園區嘅小食車都有得賣。