XO仔外遊前，除咗會翻閱旅遊書及雜誌之外，最愛就係向親友套料，搜集真人推介。今次大阪之行就應美人姐姐推薦，喺心齋橋一家西餐廳「ステーキ　オクソン」（Steak Ox On）食法日鐵板燒。鐵板燒專門店為貌似小屋o既地舖。正門有塊紅地毯，配上磚牆及玻璃門，感覺極之洋化。門外可參閱餐店晚市o既餐牌。步入店子，迅即由年長o既嬸嬸招待，先為各人掛上外套大衣，再帶領入座鐵板前o既吧位。接待處o既彩燈照出是日精選牛肉o既詳盡資訊，似乎好專業喎！由於當日只有肥肥家族光顧，眼見免費包場，小肥就好唔客氣咁偷影咗唔少環境相，包括內廳o既鐵板散座。嘻嘻，就連紳士淑女同用o既洗手間門牌都唔放過。四口子埋位先從皮套酒牌各自點選酒品。然後全體一致都要咗客8,640円o既特選午餐「Special Lunch」，並要齊兩款極上黑毛和牛。
午餐由是日前菜「オードブル」之法式鹹批作序。鹹批清涼輕巧，個人自係略嫌質感偏硬同乾。接著o既時令沙律「季節の野菜サラダ」夠就夠爽口，不過細佬就唔係太鍾意其淡而無味o既沙律醬囉。師傅以猛火燒煮極上黑毛和牛牛柳及西冷「へレステーキ、サーロイン」前，非常友善地提點小肥要準備相機捕捉熊熊火光。主菜和牛四人每款都分到有兩件，較為細食o既靚靚媽咪就分多咗兩件出黎俾乖仔們食。燒至四成熟o既和牛牛柳軟腍潤澤，而和牛西冷則更有口感，兩者均肉汁豐盛，配上碟上脆卜卜o既蒜片最為惹味可口。其實和牛一啲都唔油膩，不過同一時間食咁多件都會覺得溜，中途夾入酸爽消滯o既蕃茄「漬物」即令胃口大增。再黎多碗熱辣辣、香噴噴o既「鐵板燒燒飯」都好似唔係好夠飽咁。熱食環節以一碗暖胃o既麵豉湯「味噌汁」作結。之後嬸嬸就叫我地移玉步往下層o既客廳度食甜品。好不幸地，大肥爸爸就喺落樓梯時誤傷咗媽咪。。。西式客廳大方雅致，闊落且有氣派。坐下不久，點完咖啡及餐茶後，每人先有一客爽甜o既節令柚子味雪葩「旬のシャーベット」。甜品為芝麻蛋糕「ケーキ」伴鮮果。灰黑o既芝麻蛋糕鬆軟微甜，配上爽甜多汁o既特別柚倍添清香，簡單味佳。午餐正式由熱茶或咖啡劃上句號。法日混血o既「ステーキ　オクソン」（Steak Ox On）環境優雅，年長o既嬸嬸態度有點高傲，肥師傅就友善客氣得多。肥肥家族同點o既特選午餐質高美味，唯一份量唔多夠飽，每人成萬幾円依個價位感覺就唔係咁抵食囉！