臨離開東京前成功訂到飛去睇新宿御苑第一次搞嘅櫻花夜燈騷「NAKED櫻花新宿御苑2023」，因網上資料有限，難以估計逗留時間及離場嘅交通情況，結果晚餐就等賞完花先玩隨緣。幸好哥哥個日本女朋友收工後趕咗黎照應，九人先成功搵到的士去附近嘅「ほぼ新宿のれん街」（讀音：Hobo Shinjuku no Rengai）覓食。由於姨媽實在無力再行，落咗車後見到入口處間「大阪焼肉・ホルモン ふたご 代々木別館」（Osaka Yakiniku Horumon Futago Yoyogi Store）有幾個熱情嘅哥哥仔招喚，即果斷地決定一試，非常感激兩位哥哥仔幫忙扶助老人家入座！燒肉店面積都幾大，每組餐桌都有部抽油煙機，只係週一晚市比較淡，區內人影都唔見多個，九人結果自動包場。年輕嘅服務生們有魄力且轉數快，見長輩們坐唔到圓櫈仔，妹妹仔迅即轉俾半拍牆嘅位置，隨身物及大褸更可存放於長櫈下，細心周到得很！埋位每人先派發即棄圍裙及電話保護袋，衛生甚為講究！大肥爸爸直頭興奮到立即試用兼自薦做模特兒。多頁彩圖餐牌有日文版、英文版、繁體版、簡體版及韓文版，均可從網頁上下載（https://yakiniku-futago.com/menu/）。牆上亦有貼出推介菜式，當中有不少有趣位，如「男前生」、「美人生」等字句，就連錯對「XO」都出埋。最搞笑就係全部蛋蛋都加插咗卡通效果，實在鬼馬！入鄉隨俗，為響應日本文化，入屋第一時間當然係先點生啤飲啦！每位席上都有自用餐具及調味醬汁。和牛海膽刺身（580円/件）：意外地，燒肉店嘅海膽刺身十分鮮甜，簡單灑上碎蔥芝麻，再以輕輕燒過嘅和牛薄片、紫蘇葉及紫菜捲成嘅紫蘇和牛海膽卷外脆內軟嫩，鮮爽有層次。豬腳（480円）：姨媽所點嘅豬腳前菜小肥冇試到，不過見佢大大件又冇骨，所以就影咗俾大家參考。特級厚切牛舌（2,480円）：為確保燒肉可以最佳嘅狀態入口，部份菜式都會由妹妹仔代為燒煮，包括此道於上碟前一刻唧上檸檬汁嘅厚切牛脷。牛脷爽厚有嚼勁，而且肉汁豐盛，一客只有八件當然係要追加啦！上等蔥花鹽味牛舌（1,380円）：紅潤嘅牛脷巧薄輕盈，軟潤有彈性，連同量足如小山丘嘅蔥花一口食落即倍添清爽！牛脷厚有厚好味，薄有薄出色，兩款同為必吃推介也！烤涮牛五花肉（680円）：貌似煙肉嘅黑毛和牛腩肥膏比例高，食落成口油，未必人人都啱食，建議可加碗白飯或者冷麵送吓。特大黑毛和牛牛五花（1,680円）：鎮店名物榜首之特大黑毛和牛腩每天限量供應，食客於享用前原來有個任務，就係要喺靚肉上燒爐之時大叫「ヨイショ～～！」（Yoisho!）助興；嘻嘻，對出名大聲嘅XO仔絕對冇難度！油花勁多嘅和牛五花肉香濃多汁，大叫完好似特別好食咁。上等蔥牛里肌肉（1,780円）：屬特上稀少部位嘅牛里肌肉原塊牛扒咁上，燒到半路先切件，加點牛油秘汁後再分派俾各人。燒至三、四成熟嘅牛里肌肉十分鬆潤，油香肉腍。小牛胸腺（480円）：喺香港除咗西餐廳之外，真係未見過燒肉店賣小牛胸腺，仲要480円一客咁抵喎！豐滿有光澤嘅小牛胸腺燒焦咗外層後即變得外層香脆，軟嫩滑溜，價廉物美也！芥末豬頸肉（480円）：豬頸肉尚算鬆爽，不過可能切得較厚，所以部份就硬實咗少少。腹橫肌牛排（1,080円）：含脂量相對地較低嘅腹橫肌牛排厚薄適中，半生熟時仍鎖上豐沛嘅肉汁，軟腍可口，就連老人家要燒至全熟都話毫不乾嚡。什錦烤蔬菜拼盤（680円）：其實哥哥都有點菜菜，只係自己對菜冇乜興趣，所以就冇嘥quota試。香草冰淇淋配甜薯（480円）：半熱半凍嘅甜品凍嗰一半為雲尼拿雪糕，熱嗰半係表皮焦脆咗嘅甜蕃薯蓉，冰火交融嘅組合微甜香軟，口感溫度一樣層次分明。結尾每人都加送咗杯清涼消滯嘅乳酪冰沙飲品，喝畢腸胃舒暢得很。配帶眼鏡嘅貴客更獲贈即用即棄嘅眼鏡清潔紙，除咗飯前有袋袋保護手機之外，飯後亦有照顧沾滿油積嘅鏡片，店子衛生得非常全面！鄰近新宿御苑嘅「大阪焼肉・ホルモン ふたご 代々木別館」由幾位精力充沛嘅年輕人鎮守，全員不單充滿幹勁，而且體貼入微，由站於門前歡迎嘅第一刻到用餐後送別嘅最後一刻都可感受到團隊燃燒著熱誠嘅態度，實在難得！燒肉店衛生企理，小食、燒肉、內臟等菜式選擇多，和牛款式性價比尤其高企，有心食肆絕對值得支持！

靚靚媽咪同姨媽同為史努比迷，原本細佬安排咗同佢地一遊「東京史努比博物館」，無奈同行嘅家人嫌個幾鐘頭車程太遠，結果就改咗去原宿「竹下通り」（讀音：Takeshita-dōri）商店街尾間「PEANUTS Café SUNNY SIDE KITCHEN」，邊飲下午茶邊打卡。兩層高嘅玻璃屋外有個小花園，園內可見多隻史努比喺紅屋仔度休息，夠哂hea。室內一角有隻史努比扮看門口，英姿颯爽。樓底高高嘅用餐大堂光線充裕、空間感足，簡單嘅木造餐桌足以令白色牆身上嘅漫畫情境成為焦點，任影唔嬲！每張椅背上配有不同角色嘅頭仔，好似幼稚園課室咁得意。電子餐牌日英對照，並附有彩圖對應。點餐流程簡易快捷，清晰衛生。配備嘅餐具全部都印有花生品牌及史努比個嘜頭。紙餐巾上仲有漫畫睇添，大家忙於拍照時不停嘩嘩聲，絕對零冷場。除咗餐具之外，跟熱飲嘅糖包及所有杯墊一樣係史努比出品，配套相當齊全。Sakura Strawberry Milkshake（900円）：節令櫻花士多啤梨奶昔軟滑甜美，清涼可口。Pancake (Snoopy) with Tea Syrup（1,450円）：純粹睇樣而點嘅史努比班戟其實都好鬆，個人只係略嫌班戟厚身咗啲，即使連同忌廉及塗上糖漿都仲覺得微微偏乾。Brulee French Toast with Seasonal Fruits（1,380円）：如相所示，西多士有少少燶，幸好包心夠鬆，少少燶味可以用忌廉同糖漿蓋過，如果可以用個模灑上史努比形嘅糖粉，相信顏值會更高。咖啡屋「PEANUTS Café SUNNY SIDE KITCHEN」光猛開揚，服務生態度良好，雖然食物質素唔算頂尖，但勝在四周都係打卡位，史努比迷唔食飽都一定可以影飽。

與家人同遊日本，XO仔每次都會盡量安排一餐星級法國菜，好等長輩享受一番！疫後第一擊先應姨媽閨密推介，一嚐二星代表「Édition Koji Shimomura」。顧名思義，店名中嘅「Koji Shimomura」就係身兼主廚及老闆兩角嘅下村浩司先生。位於六本木嘅西餐廳門面融滙成大廈內牆嘅一部份，設計時尚獨特，同室內嘅大小擺設一樣咁有藝術風格。用餐大堂光鮮開揚，樓底高高，空間感足，唯一週日入座率頂多五成，有啲不尋常嘅冷清感。根據網頁指示，多人用餐直接給餐廳發送電郵，眼見隔咗三個星期都未有回應就勞煩酒店幫忙；幸好出發前兩個半月前終成功訂座，並為九人選定八道菜「Découverte」探索料理（20,000円/位）。入座時，服務生即示意餐桌上備有酒精搓手液供大家消毒，明顯對疫情仍未鬆懈。每位席上都擺有自用嘅西式餐具及圓形水松墊。飲品餐牌主要有兩頁，當中有非酒精項目、配酒套餐、侍酒師推薦嘅原樽酒品及杯裝餐酒。為慶祝復活節，姨媽們決定從厚本酒牌點選佳釀！有一點非常奇怪，點酒後，面無笑容嘅侍酒師開香檳前同點酒者確認完酒名，就迅即直接喺出面平均斟咗八杯（一人事先講明唔飲酒），不單冇俾客人呷一口睇吓酒酒有冇壞或者溫度是否適中，更冇查問各人想飲幾多就自行作出決定，實有欠專業！米芝蓮咁都俾兩粒星，唔通黑面神侍酒師係臨記？！其實一向唔好香檳嘅姨丈們只係想襯佳節於飯前哼哼杯高興吓，無意飲多過細半杯。哥哥個日本女朋友見狀都大感錯愕，所以見侍酒師準備開白酒時即講明千祈唔好好似香檳咁平均分哂一枝。眼見派對中有位日藉美女作翻譯，服務生竟然索性於介紹菜式時全程用哂日文，雖然對話語氣有禮，不過對其他人而言就有冷落之嫌囉！Amuse Bouche：為午餐打響頭炮先有精美嘅餐前小食。石柱上前方嘅脆片巧薄香脆，無奈後方嘅炸波波就有啲失色，內含鷹嘴豆及蟹肉嘅餡心咬落粉嚡味淡，完全食唔出有蟹肉嘅成份。開胃前菜原來仲有第二節。看似為陶瓷品般嘅碟盤極富藝術氣質，金橙晶瑩嘅海膽清湯啫喱鮮香軟潤，混入其中嘅魚籽醬邊爆裂於舌上，確真清涼可口。Oysters/Citrus/Seaweed：應建議一口過食哂生蠔頭盤入面嘅所有食材，脹卜卜嘅蠔隻飽滿肥美，閃亮剔透嘅檸檬青檸味啫喱酸甜醒胃，墊底仲有層軟潤滑溜嘅生蠔忌廉，頂面黑漆漆嘅野生岩縫海藻剛巧為菜式添上天然嘅海水鹽味，組合鮮濃清新，質感同調味都一樣咁細膩！意外地，暖手嘅麵包又硬又韌，好似隔夜拎返出黎叮咁，牙力唔夠真係唔好試，食後要去整牙就唔抵啦！Fresh Tuna/Geoduck Clam/Hot Spring Egg：外觀艷麗吸睛嘅象拔蚌吞拿魚他他極富線條感，蓋面塊超薄嘅脆片乃名叫「モズク」（讀音為「mozuku」）嘅海藻所壓炸而成，入口猶如一陣海風咁飄滲進味蕾，妙哉妙哉！海藻脆片下以紫蘇花冧點綴嘅象拔蚌吞拿魚他他本身鮮潤軟彈，撈入酸酸甜甜嘅烏梅汁及其覆蓋住嘅溫泉蛋令他他變得尤其順滑，吃畢亦毫不膩滯。Lobster/Kadaif：喺面灑上櫻花蝦嘅海鮮菜式主角其實係暗藏於土耳其式炸麵團內嘅螯龍蝦，食落係就係好鬆化酥脆，不過唔講明的話可能會忽略咗中間有螯龍蝦肉，墊底黏上一層薄薄嘅檸檬果醬，旁邊另有橙色嘅紅椒醬汁，酸甜複雜嘅配搭似係將多種食材堆埋一齊夾硬造咗個餸出黎咁，雜亂無章到主題係乜都搞唔清！Aichi Duck：源自愛知縣嘅鴨胸粉嫩厚肉，鬆潤軟腍，皮層超脆，而且肥膏不多，簡單伴配香菇及鮮嫩嘅菜苗已能突出紅肉主角嘅地位，唯一美中不足嘅就係調味過咸。Avant Dessert：甜品上場前先有泡冰為味蕾洗滌一番。小茶杯內最底層為晚柑泡冰，面頭球綠色嘅意式雪糕並非綠茶或開心果味，竟然係帶有紫蘇香嘅菠蘿味雪糕，雪糕泡冰清新微甜且分外醒神。Strawberry Tart：服務生介紹此道甜品乃士多啤梨撻嘅解體版，設計者想食客於進食時於口腔內重組撻品，所以細佬嗰份要走果仁都好易做得到。甜品精緻鮮美，圍住碟邊嘅原粒士多啤梨又大又爽甜，碟盤中心嘅基礎部份用咗糖漿去黐實啲士多啤梨小塊、脆米粒同士多啤梨忌廉，造成脆卜卜嘅玻璃糖結晶品，頂面加咗球花草茶味乳酪雪葩，口感有層次得黎極其輕盈。Mignardises：美點共有三輝，分別為肉桂葉造出嘅餅塊。被稱作為「financier cake」但卻非金磚形嘅黑橄欖蛋糕仔。同埋個架一郁就會搖嘅朱古力。小點均內含果仁，所以細佬嗰份只有果乾同餅仔。結尾要咗杯特濃咖啡，但如相所示，咖啡杯柄及杯邊位都可清楚睇到新舊咖啡漬，感覺衛生管理出現咗問題，因為預備咖啡及呈上咖啡嘅兩組人明顯都冇檢查過，真心想問吓米芝蓮係點樣俾得出星星呢？！東京星級法國餐廳「Édition Koji Shimomura」新潮有格調，新穎獨特嘅菜式主要用上日本食材烹調，大多鮮美健康，唔會好似傳統法國菜咁膩滯，無奈服務團隊有欠專業，衛生亦出現咗問題，如此高級嘅定價絕不合理！請恕小弟直言，一家餐廳只憑老闆主廚獨撐實難以維持，食物再好都要靠其他工作人員配合先能成功及保持水準，或許下村先生係時候要與一眾隊員好好溝通吓。

朝早喺表參道血拼完一輪，姨媽話午餐唔想再食原定計劃中嘅牛牛，要求食魚生，小肥唯有搵Google之神幫忙，結果喺區內搵咗間壽司居酒屋「八兵衛」（Hachibe）。店子門外擺出日英對照嘅午市餐牌。入口處有幾級樓梯，真係要小心睇路行。八口子冇訂位，所以要分開兩張枱坐。花紋多多嘅餐桌黐黐立立，濕毛巾就放喺枱面，感覺不甚衛生。飲品項目共有五頁。因為之後仲準備去買玩具，酒鬼三人組結果只係飲咗一輪「九平次純米大吟釀清酒」（1,680円/盒）。午市套餐均包有麵豉湯、自助沙律吧及無限添加嘅白飯，價格由主菜而定。沙律選材新鮮，菜菜十分清爽。握り特上10貫（中トロ、イクラ、ウニ入り）＋巻物（3,000円）：特上壽司午餐雖然包咗中拖羅、三文魚籽同海膽，不過魚生質素平庸。魚生不單外表色澤暗淡，咬落魚油欠奉，重點其中嗰兩件三文魚籽同海膽壽司仲勁腥，認真攞膽！山形三元豚ロースの厚切り生姜焼（1,500円）：反而預先切好一條條嘅薑燒豬扒尚算鬆爽，惹味得多。壽司店「八兵衛」室內光線柔和，入夜後嘅酒客未必留意到，不過小肥清楚睇到同感受到場內衛生水平比一般低！獨撐樓面嘅外籍哥哥黑面吋咀，不大友善好客。午市魚生質量同樣低企，價錢又唔係特別平，似乎各方面都唔係好合格；餐廳自稱為壽司居酒屋，XO仔就覺得有呃酒客之嫌囉！

週日晚買咗飛飛上澀谷人氣新景點「Shibuya Sky」欣賞東京夜景，因難以估計逗留時間，晚餐就冇刻意訂位。睇完先求其喺商場入面搵咗間人龍最短嘅「天寅 渋谷スクランブルスクエア店」排隊食天婦羅。大排檔式嘅小店只有高櫈吧位。真係好好彩，雖然要分開坐，六口子竟然係最後一批入座，結果仲食到人地打烊，影到最中央廚房嘅情況。廚師們個個帶哂口罩，相當衛生。自助餐具及調味均擺放於餐桌上。厚本餐牌中，其中五頁為飲品項目。家人口味不一，清酒、梅酒各有各點。食物項目都有好幾頁，不過小肥原來只影咗三頁。天ぷら屋のネギトロ（550円）：DIY碎蔥拖羅卷嘅新鮮洋蔥絲及蘿蔔碎清新爽脆，可惜主角拖羅蓉就粉咗啲，喺天婦羅專門店似乎都係唔應該點魚生食。姨媽們食量不大，所以就自選咗幾款天婦羅菜式。多款中，最正必選鬆化爽彈嘅蝦蝦「海老」（390円），略為失色嘅就係隻唔多溏心嘅蛋蛋「味玉天」（280円）。意外地，看似炸漿極厚嘅炸蠔「牡蠣」（450円/兩隻）肥美鮮嫩、外脆內軟。麺セット（300円）：配套餐嘅蕎麥麵份量絕不比天丼嘅飯底少，麵條軟腍，湯底清甜，加埋啲脆卜卜一齊食直令口感更加豐富。天丼專門店「天寅」環境企理，服務生友善客套，天婦羅菜式大多美味可口，量足飽肚，價格合理，快餐半小時左右已可埋單，效率絕對高。