東大 京都店

Open Now

Now Closed

由京都搭車去大阪之前，中午先喺京都車站大樓十樓嘅「京都拉麵小路」食咗碗拉麵先起行。拉麵街內太多選擇，頭腦比較簡單嘅XO仔最終從日本餐廳評論平台上揀出最高分嘅「ラーメン東大」。拉麵店唔洗行好遠，紅黃色嘅招牌相當搶眼。行入去搵位時，樓面位半黑面叔叔指出，所有客人必先選定食物及全數預繳，帶埋飛仔先可排隊輪侯入座。點菜機共有日文、英文及中文三種語言，菜式均附有彩圖參考，亦有多個電子付款方法，操作簡易。小店面積唔算大，但勝在啲位唔會太迫。餐桌上擺有自助餐具、紙巾、溫水、調味料及牙籤。嘻嘻，另外仲有免費蛋蛋添！第一次幫襯，大家都揀咗門外餐牌上最大幅相嘅德島拉麵！德島拉麵（800円）：拉麵啡色嘅壽喜燒汁湯底非常重口味，淨飲會覺得又咸又甜；湯中嘅芽菜勁爽脆；拉麵麵條粗幼適中、質感軟彈；薄薄嘅豬肉片則入哂味。拉麵精髓在於一定要連隻生雞蛋食！看圖識食地喺碗中打入蛋蛋，好似食沾麵咁夾起每啖麵麵同肉肉時都先黏上蛋黃，食落即倍添滑溜，就連啲湯都變得冇咁咸，新穎嘅食法好有新鮮感，800円碗絕對抵食！餃子（480円）：如相所示，餃子賣相已經好乾，咬落個餡不單冇乜汁，而且仲好韌皮，雖然唔貴，不過堅唔好食！京都車站拉麵